Молебен о здравии, в больнице
ИЕРЕЙ: Благословен Бог наш, всегда, ныне, и присно, и во веки веков.
ЧТЕЦ: Аминь. Слава Тебе, Боже наш, слава Тебе.
ХОР: Царю Небесный, Утешителю, Душе истины, / Иже везде сый и вся исполняяй, / Сокровище благих и жизни Подателю, / прииди и вселися в ны, / и очисти ны от всякия скверны, // и спаси, Блаже, души наша.
ЧТЕЦ: Святый Боже, Святый крепкий, Святый Безсмертный, помилуй нас (трижды).
Слава Отцу, и Сыну, и Святому Духу, и ныне и присно, и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имени Твоего ради.
Господи, помилуй (трижды).
Слава Отцу, и Сыну, и Святому Духу, и ныне и присно, и во веки веков. Аминь.
Отче наш, иже еси на небесех. Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь и остави нам долги наша, якоже и мы оставляем должником нашим, и не введи нас во искушение, но избави нас от лукаваго.
ИЕРЕЙ: Яко твое есть Царство, и Сила, и Слава, Отца, и Сына, и Святаго Духа, ныне и присно, и во веки веков.
ЧТЕЦ: Аминь. Господи, помилуй (12 раз).
Слава Отцу, и Сыну, и Святому Духу, и ныне и присно, и во веки веков. Аминь.
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем самому Христу, Цареви и Богу нашему.
Псалом 70:
ЧТЕЦ: На Тя, Господи, уповах, да не постыжуся во век.
Правдою Твоею избави мя и изми мя; приклони ко мне ухо Твое и спаси мя.
Буди ми в Бога защитителя и в место крепко спасти мя; яко утверждение мое и прибежище мое eси Ты.
Боже мой, избави мя из руки грешнаго, из руки законопреступнаго и обидящаго:
Яко Ты eси терпение мое, Господи, Господи, упование мое от юности моея.
В Тебе утвердихся от утробы, от чрева матере моея Ты eси мой покровитель; о Тебе пение мое выну.
Яко чудо бых многим; и Ты помощник мой крепок.
Да исполнятся уста моя хваления, яко да воспою славу Твою, весь день великолепие твое.
Не отвержи менe во время старости; внегда оскудевати крепости моей, не остави менe.
Яко реша врази мои мне, и стрегущии душу мою совещаша вкупе, глаголюще: Бог оставил eсть eго, пожените и имите eго, яко несть избавляяй.
Боже мой, не удалися от менe; Боже мой, в помощь мою вонми.
Да постыдятся и изчезнут оклеветающии душу мою, да облекутся в студ и срам ищущии злая мне.
Аз же всегда возуповаю на Тя, и приложу на всяку похвалу Твою.
Уста моя возвестят правду Твою, весь день спасение Твое, яко не познах книжная.
Вниду в силе Господни: Господи, помяну правду Тебe eдинаго.
Боже мой, имже научил мя eси от юности моея, и доныне возвещу чудеса Твоя.
И даже до старости и престарения, Боже мой, не остави менe, дондеже возвещу мышцу Твою роду всему грядущему, силу Твою и правду Твою, Боже, даже до вышних, яже сотворил ми eси величия: Боже, кто подобен Тебе?
Елики явил ми eси скорби многи и злы?
И обращься оживотворил мя eси и от бездн земли возвел мя eси.
Умножил eси на мне величествие Твое, и обращься утешил мя eси, и от бездн земли паки возвел мя eси.
Ибо аз исповемся Тебе в людех, Господи, в сосудех псаломских истину Твою, Боже: Воспою Тебе в гуслех, Святый Израилев.
Возрадуетеся устне мои, eгда воспою Тебе, и душа моя, юже eси избавил; eще же и язык мой весь день поучится правде Твоей, eгда постыдятся и посрамятся ищущий злая мне.
Слава Отцу, и Сыну, и Святому Духу, и ныне и присно, и во веки веков. Аминь.
Аллилуиа, аллилуиа, аллилуиа, слава Тебе, Боже (трижды)
Тропарь Господу Иисусу Христу, глас 4:
ХОР: Скорый в заступлении един сый, Христе, / скорое свыше покажи посещение страждущему (ей, им) рабу (е, ам) Твоему (ей, им), / и избави от недуг и горьких болезней / и воздвигни во еже пети Тя и славити непрестанно, // молитвами Богородицы, Едине Человеколюбче.
Слава Отцу, и Сыну, и Святому Духу и ныне, и присно, и во веки веков. Аминь.
Кондак Господу Иисусу Христу, глас 2:
ХОР: На одре болезни лежащаго (их) / и смертною раною уязвленнаго (ых), / якоже иногда воздвигл еси, Спасе, Петрову тещу / и разслабленнаго на одре носимого, / сице и ныне, Милосерде, страждущаго (их) посети и исцели: / Ты бо един еси недуги и болезни рода нашего понесый, // и вся могий, яко Многомилостив.
ИЕРЕЙ: Премудрость:
ЧТЕЦ: Прокимен, глас 7:
Помилуй мя, Господи, яко немощен есмь, исцели мя, яко смятошася кости моя.
ХОР: Помилуй мя, Господи, яко немощен есмь, исцели мя, яко смятошася кости моя.
ЧТЕЦ: Яко несть в смерти поминаяй тебе.
ХОР: Помилуй мя, Господи, яко немощен есмь, исцели мя, яко смятошася кости моя.
ЧТЕЦ: Помилуй мя, Господи, яко немощен есмь, ...
ХОР: ... исцели мя, яко смятошася кости моя.
ИЕРЕЙ: Премудрость, прости, услышим Святаго Евангелия. Мир всем.
ХОР: И духови твоему.
ИЕРЕЙ: От Матфея (или от Марка) святаго Евангелия чтение.
ХОР: Слава тебе, Господи, слава Тебе.
ИЕРЕЙ: Вонмем.
Евангелие от Матфея, зачало 25:
ИЕРЕЙ: Во время оно, вшедшу Иисусу в Капернаум, приступи к Нему сотник, моля Его и глаголя: Господи, отрок мой лежит в дому разслаблен, люте стражда. И глагола ему Иисус: Аз пришед изцелю его. И отвещав сотник, рече Ему: Господи, несмь достоин, да под кров мой внидеши, но токмо рцы слово, и изцелеет отрок мой. Ибо аз человек есмь под властию, имый под собою воины, и глаголю сему: иди, и идет. И другому: прииди, и приходит. И рабу моему: сотвори сие, и сотворит. Слышав же Иисус, удивися, и рече грядущым по Нем: аминь глаголю вам, ни во Израили толики веры обретох. Глаголю же вам, яко мнози от восток и запад приидут и возлягут со Авраамом и Исааком и Иаковом во Царствии Небеснем. Сынове же царствия изгнани будут во тму кромешнюю, ту будет плачь и скрежет зубом. И рече Иисус сотнику: иди, и якоже веровал еси, буди тебе. И изцеле отрок его в той час.
ХОР: Слава тебе, Господи, слава Тебе.
Ектения:
ИЕРЕЙ: Помилуй нас, Боже, по велицей милости твоей, молим ти ся, услыши и помилуй.
ХОР: Господи, помилуй, Господи, помилуй, Господи, помилуй.
ИЕРЕЙ: Врачу душ и телес, со умилением в сердце сокрушенном к тебе припадаем, и стеняще вопием ти: исцели болезни, уврачуй страсти душ и телес рабов твоих (имярек) и простив им, яко благосерд, вся прегрешения, вольная и невольная, скоро воздвигни от одра болезни, молим ти ся, услыши и помилуй.
ХОР: Господи, помилуй, Господи, помилуй, Господи, помилуй.
ИЕРЕЙ: Огненную болезнь Петровой тещи прикосновением твоим исцеливый, и ныне люте страждущих рабов твоих (раба) имярек, болезнь благосердием твоим исцели, здравие им (ему) скоро подавая, прилежно молимтися, источниче цельбам, услыши и помилуй.
ХОР: Господи, помилуй, Господи, помилуй, Господи, помилуй.
ИЕРЕЙ: Еще молимся о плодоносящих и добродеющих во всечестней лечебнице сей, труждающихся, врачующих и помогающих им людех, ожидающих от тебе великия и богатыя милости.
ХОР: Господи, помилуй, Господи, помилуй, Господи, помилуй.
ИЕРЕЙ: Услыши ны, Боже Спасителю наш, упование всех концов земли и сущих в море далече, и милостив, милостив буди, Владыко, о гресех наших и помилуй ны. Милостив бо и человеколюбец Бог еси, и тебе славу воссылаем, Отцу и Сыну, и Святому Духу, ныне и присно, и во веки веков.
ХОР: Аминь.
ИЕРЕЙ: Господу помолимся.
ХОР: Господи, помилуй.
Молитва:
ИЕРЕЙ: Влады́ко, Вседержи́телю, Святы́й Царю́, наказу́яй и не умерщвля́яй, утвержда́яй низпа́дающия и возводя́й низве́рженныя, теле́сныя челове́ков ско́рби исправля́яй, мо́лимся Тебе́, Бо́же наш, раба́ Твоего́ (и́мя) немощству́юща посети́ ми́лостию Твое́ю, прости́ ему́ вся́кое согреше́ние во́льное и нево́льное. Ей, Го́споди, враче́бную Твою́ си́лу с Небесе́ низпосли́, прикосни́ся телеси́, угаси́ огне́вицу, укроти́ стра́сть и вся́кую не́мощь тая́щуюся, бу́ди врач раба́ Твоего́ (и́мя), воздви́гни его́ от одра́ боле́зненнаго и от ло́жа озлобле́ния це́ла и всесоверше́нна, да́руй его́ Це́ркви Твое́й благоугожда́юща и творя́ща во́лю Твою́. Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
ХОР: Аминь.
ИЕРЕЙ: Премудрость: Пресвятая Богородице спаси нас.
ХОР: Честнейшую херувим и славнейшую без сравнения серафим, без истления Бога Слова рождшую, Сущую Богородицу Тя величаем.
ИЕРЕЙ: Слава Тебе, Христе Боже наш, слава Тебе.
ХОР: Слава Отцу, и Сыну, и Святому Духу, и ныне и присно, и во веки веков. Аминь. Господи, помилуй, Господи, помилуй, Господи, помилуй. Благослови.
ИЕРЕЙ: (Воскресый из мертвых) Христос, истинный Бог наш, молитв ради Пречистыя своея Матери, святого великомученика и Победоносца Георгия, его же есть храм, и его же есть лечебница, помилует и спасет нас, яко Благ и Человеколюбец.
ХОР: Аминь. Господи, помилуй, Господи, помилуй, Господи, помилуй.
Молебен о здравии, в больнице, церковный шрифт
Молебен о здравии, в больнице, гражданский шрифт
 |  |  |
Тинькофф | Telegram | Сбербанк |